Një projektligj që ndalon të folurën dhe veshjen “e dëmshme për shpirtin e popullit kinez” ka ndezur debat në Kinë.
Nëse ligji hyn në fuqi, personat e shpallur fajtorë mund të gjobiten ose burgosen, por propozimi nuk përcakton ende se çfarë përbën shkelje, raporton BBC.
Përdoruesit e mediave sociale dhe ekspertët ligjorë kanë bërë thirrje për më shumë qartësi.
Kina publikoi së fundmi një sërë ndryshimesh të propozuara në ligjet e saj të sigurisë publike – reformat e para në dekada.
Ligji i veshjeve ka tërhequr reagime të menjëhershme nga publiku – me shumë komentues online që e kritikojnë atë si të tepruar dhe absurd.
Klauzolat e diskutueshme thonë se njerëzit që veshin ose detyrojnë të tjerët të veshin veshje dhe simbole që “minojnë shpirtin ose lëndojnë ndjenjat e kombit kinez” mund të ndalohen deri në 15 ditë dhe të gjobiten deri në 680 dollarë.
Ata që krijojnë ose shpërndajnë artikuj ose fjalime që e bëjnë këtë, gjithashtu mund të përballen me të njëjtin ndëshkim.
Ndryshimet ligjore të propozuara ndalojnë gjithashtu “fyerjen, shpifjen apo cenimin e emrave të heronjve dhe martirëve vendas” si dhe vandalizmin e statujave të tyre përkujtimore.
Në internet, njerëzit vunë në dyshim se si zbatuesit e ligjit mund të përcaktonin në mënyrë të njëanshme kur “ndjenjat” e kombit “lëndohen”.
Ekspertët ligjorë në vend kanë kritikuar gjithashtu formulimin e paqartë të ligjit, duke thënë se ai mund të jetë i hapur për abuzim.
