Këto rrugë dikur ishin përplot njerëz. Fshati Zubovc i Gostivarit dikur kishte gjallëri, ndërsa oborri i shkollës, ishte përplot nxënës, zëri i të cilëve jehonte larg. Kafenetë ishin të mbushura, dhe nuk mungonte as muhabeti e shakatë, por sot, fshati ka mbetur me rrugë të zbrazura, kafenetë boshe, ndërsa shkolla, mezi vërehet se ka nxënës brenda.
“Njerëzit tani është fakt se edhe nuk bëjnë shumë fëmijë, nuk duan të lodhën shumë. Unë në familjen time isha vet i gjashti me vëllezër e motra, pastaj nuset ditët e sodit janë moderne s’duan fëmijë shumë. Në Maqedoni nuk ikin gjithë për jetë më të mirë, por politika e keqe ka ndikuar të ikin njerëzit sepse nuk shohin siguri më këtu”, shtoi një banor.
“Edhe pse i kaluam gati dy orë filmime këtu në fshatin Zubovcë të komunës së Vrapçishtit, asnjë njeri nuk duket rrugës. Rrugët, sheshi por edhe fshati duken të shkretë dhe e gjithë, sipas banorëve, ndodh si pasojë e migrimeve”, raporton Bashkim Sulejmani, gazetar.
Në Shkollën e fshatit dikur mësonin mbi 70 nxënës, ndërsa tani, e gjithë shkolla, ka vetëm 15 nxënës.
“Edhe në shkollën tonë, situata nuk është aspak më e mirë se sa në shkollat tjera. Kemi shumë migrime fshat qytet dhe po zvogëlohet numri edhe tek ne. Dy paralele kemi, tek njëra mësojnë nxënësit e klasave të dyta dhe të katërta dhe tjetra janë klasa e parë dhe e tretë, ndërsa klasë të pestë e gjithë gjenerata është pa nxënës. Kanë ikur. Klasa e katër kemi 6 nxënës, e treta dy e dyta dy nxënës dhe vetëm tre nxënës kemi regjistruar në klasë të parë”, deklaroi Kristina Dimitrievska mësuese.
Vetëm dy kilometra mbi Zubvovcë, vizituam edhe fshatin novosellë. Aty banojnë dy çifte pleqsh që në shaka duke ikur nga kamerat, na thanë se kanë mbetur për ruajtur fshatin.
