Zëdhënësja e Kompanisë Rajonale të Ujësjellësit “Prishtina”, Arjeta Mjeku ka thënë se borxhi i konsumatorëve në këtë kompani që nga paslufta është 45 milionë euro.
Siç tha Mjeku, 80 për qind e ujit shfrytëzohet nga amvisëria, ndërsa borxhi i kësaj kategorie të konsumatorëve përbën shumicën e borxhit, saktësisht 40 milionë euro. Ndërsa, bizneset dhe institucionet kanë borxh prej 5 milionë eurosh.
Ajo ka sqaruar se i kanë dërguar dhjetëra lëndë te përmbaruesi, duke shtuar se më ketë formë kanë arritur që të inkasojnë një shumë të madhe të madhe të borxheve.
“Borxhi i konsumatorëve të amvisërisë, institucioneve, bizneseve të vogla dhe të mëdha, ndaj shërbimeve të ujësjellësit dhe kanalizimit, po flasim që nga paslufta deri më sot është mbi 45 milionë euro. 80 për qind e sasisë së ujit shpenzohet nga amvisëria, ndërkaq borxhi, vetëm i konsumatorëve të amvisërisë, është rreth 40 milionë euro. 5 milionë euro janë borxhe të bizneseve të vogla e të mëdha dhe të institucioneve”, ka thënë Arjeta Mjeku për Ekonomia Online.
“Në përmbarim dërgohen ata konsumatorë që kanë borxhe mbi 100 euro. Kemi dërguar me dhjetëra lëndë, jemi duke përgatitur çdo ditë nga zyra ligjore lëndë të tjera. Pikërisht për këtë arsye u kemi bërë apel edhe qytetarëve që t’i shmangin taksat ndaj përmbaruesve. Pra, ta paguajnë borxhin para se lënda e tyre të shkojnë te përmbaruesi privat. Me përmbarim kemi arritur qe ta marrim një shumë të konsiderueshme të parave nga borxhlinjtë”.
Mjeku ka bërë të ditur se çdo të mërkurë dhe premte, me asistencë të Policisë së Kosovës, bëjnë çkyqjen e tri llojeve të konsumatorëve.
Sipas saj, ata që kyçen në mënyrë ilegale, përveç që kyçen nga furnizimi me ujë, ushtrohet edhe kallëzim penal.
