Naser Kelmendi u dënua nga Gjykata Themelore në Prishtinë me katër vjet e tetë muaj burgim.
Ai akuzohet për trafikim me narkotikë.
Aktgjykimi u shpall nga kryetarja e trupit gjykues Suzana Çerkini.
Sipas aktgjykimit, koha e kaluar në privim lirie, do t’i llogaritet në shqiptimin e dënimit.
Sipas saj, lidhur me nxjerrjen e këtij aktgjykimi, gjykata ka vlerësuar rrethanat lehtësuese dhe rënduese.
Si rrethanë rënduese, gjykata ka marrë përfshirjen e shumë personave, metodat e sofistikuara për fshehjen e narkotikëve, ndërsa si rrethanë lehtësuese është marrë koha e kaluar që nga kryerja e veprës penale, nga e cila kohë nuk është gjetur ndonjë vendim i formës së prerë që i akuzuari ka kryer ndonjë vepër të njëjtë apo të ngjashme, shkruan Betimi për Drejtësi.
Kelmendi është i detyruar të paguajë shumën prej 300 euro për paushallin gjyqësor dhe 100 euro për fondin për kompensimin e viktimave të krimit.
Aktgjykimi u shpall në mungesë të të akuzuarit.
