Një vajze tetëvjeçare me kushte themelore mjekësore, e cila vdiq në paraburgimin e Patrullës Kufitare të ShBA-së, iu refuzuan vazhdimisht kërkesat për të shkuar në spital, raporton BBC, transmeton Klan Kosova.
Anadith Tanay Reyes Alvarez u pa nga stafi mjekësor nëntë herë në tre ditë – me “ethe, simptoma të ngjashme me gripin dhe dhimbje”, thanë hetuesit.
Ajo u vizitua nga një infermiere katër herë ditën që vdiq.
Megjithatë, infermierja refuzoi “tre-katër kërkesa të nënës së vajzës për të thirrur një ambulancë”.
Detajet e tragjedisë vijnë nga Dogana dhe Patrulla Kufitare, e cila ka shkruar një raport për vdekjen e Alvarez.
Vajza, e cila lindi në Panama nga prindër nga Hondurasi, u trajtua për simptomat e saj më 16 maj me ilaçe kundër gripit dhe temperaturës, pako akulli dhe një dush të ftohtë, tha ajo.
Por asnjë nga stafi nuk dukej në dijeni se Alvarez vuante nga anemia drapërocitare, një gjendje kjo që zakonisht kërkon trajtim gjatë gjithë jetës, ose se ajo kishte një histori të sëmundjeve të lindura të zemrës.
Familja tha se ata raportuan historinë e saj mjekësore kur ishin marrë për herë të parë në paraburgim në një institucion tjetër një javë më parë.
Rregullat e agjencisë thonë se paraburgimi nuk duhet të jetë më i gjatë se tre ditë, por shpesh nuk është kështu, pasi koha mesatare e përpunimit është zgjatur në mënyrë drastike vitet e fundit.
Familja e tyre u transferua në objektin e Harlingenit, ku Alvarez vdiq, për izolim mjekësor pasi vajza rezultoi pozitive për grip. Kamera në objekt ishte prishur për javë të tëra dhe hetuesit kanë bashkuar ngjarjet nga intervistat.
Është thënë se një anëtar tjetër i stafit mjekësor raportoi se kishte sjellë “një grumbull dokumentesh” dhe disa tableta të acidit folik nga shtëpia e familjes tek infermierja në mëngjesin që vajza vdiq. Acidi folik – i quajtur edhe vitamina B9 – mund të përdoret për të ndihmuar në trajtimin e anemisë.
Infermierja e lejoi Alvarezin të merrte një tabletë, por “refuzoi të rishikonte dokumentet”, tha CBP.
Në atë fazë, simptomat e saj ishin përkeqësuar duke përfshirë dhimbje stomaku, të përziera dhe vështirësi në frymëmarrje.
Disa orë më vonë, pas vizitës së katërt atë ditë tek infermierja, nëna e Alvarezit u kthye duke mbajtur në krahë vajzën e saj, e cila dukej se kishte një krizë. Pikërisht në atë moment u thirrën shërbimet e urgjencës, por tetëvjeçarja u deklarua e vdekur brenda një ore.
Versioni i agjencisë për ngjarjet duket se mbështet detajet në një intervistë që nëna e saj, Mabel Alvarez Benedicks i dha agjencisë së lajmeve Associated Press disa ditë pas vdekjes së vajzës së saj.
“Më vranë vajzën, sepse ajo ishte gati një ditë e gjysmë pa marrë frymë”, tha ajo për AP. “Ajo qau dhe lutej për jetën e saj dhe ata e injoruan. Ata nuk bënë asgjë për të”.
Rishikimi i CBP-së deri më tani sugjeron që stafi mjekësor nuk është konsultuar kurrë me mjekët – duke përfshirë një pediatër në thirrje – për sëmundjen e Alvarezit.
Autopsia e vajzës së re gjeti një grumbullim të lëngjeve në zgavrën e saj të kraharorit dhe vuri në dukje “përpjekjen për riparimin kirurgjik të stenozës së aortës [një gjendje të zemrës] të vajzës, dhe gjithashtu iu referua historisë së dhënë të anemisë drapërocitare”. Shkaku i vdekjes ende nuk është deklaruar zyrtarisht.
Në një deklaratë të veçantë të enjten, kreu në detyrë i CBP, Troy Miller, tha se vdekja e saj ishte “një tragjedi thellësisht shqetësuese dhe e papranueshme”.
“Disa ofrues mjekësorë të përfshirë në këtë incident tani janë ndaluar të punojnë në objektet e CBP-së”, tha ai.
Oficeri i lartë mjekësor i agjencisë po kryente një rishikim të procedurave në të gjitha objektet e saj dhe ishin ndërmarrë hapa për të shqyrtuar rastet e “të gjithë individëve të brishtë mjekësor”, shtoi ai.
Vdekja e Alvarezit ishte vdekja e dytë në paraburgim të një fëmije në dy javë, pasi një djalë 17-vjeçar nga Hondurasi, Ángel Eduardo Maradiaga Espinoza, vdiq në një strehë në Florida të drejtuar nga Zyra e Departamentit të Shëndetësisë dhe Shërbimeve Njerëzore për Zhvendosjen e Refugjatëve.
