Ndërron jetë gjyqtarja e Themelores në Prishtinë

Pas një sëmundje ka ndërruar jetë gjyqtarja e Gjykatës Themelore në Prishtinë, Shadije Gërguri.

Gjykata përherë do ta kujtoj gjyqtaren Shadije për punën, profesionalizmin dhe virtytet e larta të saj.

Për ditën e varrimit dhe kohën e mbajtjes së Mbledhjes Komemorative, gjykata do të del me një njoftim të radhës.

Shadije Gërguri ishte gjyqtare në Departamentin Special në Gjykatën Themelore në Prishtinë. Gjyqtarja Gërguri kishte diplomuar në Fakultetin Juridik, Universiteti i Prishtinës në vitin 1991, ndërsa provimin e jurisprudencës e kishte përfunduar në vitin 2003.

Nga viti 2003 deri në vitin 2004 ajo kishte ushtruar detyrën e Përkthyeses në Gjykatën Komunale në Mitrovicë, ndërsa nga viti 2004 deri më 2006 kishte ushtruar detyrën si bashkëpunëtore profesionale në Prokurorinë Publike Komunale.

Në vitin 2010 ishte emëruar gjyqtare në Gjykatën Komunale në Prishtinë. Me datë 01.01.2013 Shadije Gërguri ishte emëruar gjyqtare në Departamentin e Krimeve të Rënda në Gjykatën Themelore në Prishtinë, të cilën pozitë e kishte ushtruar deri në muajin korrik të vitit 2019. Nga muaji korrik 2019 ishte caktuar gjyqtare në Departamentin Special të Gjykatës Themelore në Prishtinë.