Pas disa ditësh trajtim në Intensiven e Qendrës Klinike Universitare të Kosovës, njëra ndër pasagjeret që u lëndua në aksidentin në fshatin Gërdoc të Podujevës, ka ndërruar jetë. E ndjera, nuk arriti t’iu bëjë ballë plagëve dhe vdiq të dielën pasdite.
Nga Emergjenca kanë bërë me dije se bëhet fjalë për një 70-vjeçare, e cila po merrte trajtim në QKUK që nga mbrëmja e 19 majit, për shkak të lëndimeve të rënda që kishte marrë.
Për vdekjen e saj është njoftuar edhe Policia, me ç’rast janë ndërmarrë veprimet e nevojshme, në koordinim me Prokurorin e Shtetit, i cili ka urdhëruar që trupi i pajetë të tërhiqet nga reparti intensiv për t’u dërguar në IML për obduksion.
Ndryshe, aksidenti ka ndodhur mes dy veturave, mbrëmjen e së premtes, ku për pasojë shtatë persona kishin pësuar lëndime trupore.
